Hugot nga ginapahanumdon sang Iloilo Police Provincial Office (IPPO) sa mga pumuluyo sang Iloilo Province nga mag-angkon sang travel pass, quarantine pass, kag identification card (ID) antes maglabay sa mga border control points sang probinsya.
Sa interview sang Bombo Radyo kay Police Colonel Gilbert Gorero, director sang IPPO, iya ginpahayag nga antes pa man nag-umpisa ang pag-istrikto sa mga checkpoint sa probinsya, makapila na man nahatagan sang nagakaigo nga impormasyon ang mga pumuluyo nga magpakita sang passes agud indi na mabudlayan kun maglabay sa border control points.
Suno kay Gorero, nagapati sila nga nagakadapat iduso ang istrikto nga pagpatuman sang pagsulundan sa mga checkpoints sa diin indi sila magbaton sang rason nga wala sang ideya sa executive order ni Iloilo Governor Arthur Defensor Jr. tuhoy sa hugot nga pagpatuman sang protocol.
Nahibaluan nga nasaad sa executive order ni Defensor nga humalin Hunyo 4 tubtob Hunyo 18, 2021, ang mga Returning Residents sang probinsya, Authorized Persons Outside Residence (APOR) kag Overseas Filipino Workers (OFWs) lamang ang pahanugutan nga makabyahe sa probinsya sang Iloilo.
Bangud sini, may yara sang mga ginapabalik sa ila nga mga lugar bangud indi man essential ang katuyuan sa pagbyahe kag wala sang dala nga mga travel pass.
Sa pihak sini, nagapasalamat man ang natungdan sa tanan nga border enforcers, mga katapo sang pulis, kag force multipliers kaangay sang barangay officials kag mga barangay tanod sa 24 ka oras nga serbisyo sa pumuluyo sang probinsya.
Nagapangabay man si Gorero sa tanan sang kooperasyon kag pagsunod sa tanan nga ginapatuman nga pagsulundan sang probinsya agud mapanubo kag malikawan ang local transmission sang COVID-19.
