May mga ginpabalik kag wala ginpasulod nga mga tawo ang mga pulis sang Sibunag Municipal Police Station sa Sibunag, Guimaras bangud wala sila sang may ipakita nga travel pass kag wala sang essential nga mga transaksyon sa una nga adlaw nga pagpatuman sang executive order 24 ukon pagpatuman sang local border restrictions.
Sa interview sang Bombo Radyo kay PLt. Val Cambel, hepe sang Sibunag Municipal Police Station, iya ginpahayag nga gamay man lang ang mga tawo nga wala ginpasulod sa nasambit nga banwa bangud mahimo nga ang iban nga pumuluyo ang nakahibalo na sa EO ni Guimaras Governor Samuel Gumarin.
Suno kay Cambel, 24/7 ang ila pagbantay sa border control area kaupod ang force multiplier kag ang task force sang local government unit (LGU)-Sibunag.
Magluwas sa local border restriction, may mga adjustments man sa oras sang byahe sa sakayan pandagat sa diin naga-umpisa lang ini las 6 sa aga tubtob las 3 sa hapon.
