Nagpaathag ang More Electric and Power Corporation (MORE) Power sa ila mga konsumidor kun ngaa nagakadapat magbayad ang mga ini sa due date kada bulan.
Sa interview sang Bombo Radyo kay Ms. Joy Fantilaga, spokesperson sang MORE Power, iya ginpahayag nga nalakip sa billing statement sang isa ka konsumidor ang MORE related charges, Supplier related charges, Subsidies kag Government Charges.
Sa idalom sang Government charges, diri nalakip ang generation charge nga amo ang may dako nga portion sang balayran bangud diri ginakuha sang MORE Power ang bayad para sa mga supplier sang kuryente.
Ang VAT naman kag other charges nga masami ginakatingalahan sang mga konsumidor kun sa diin nagakadto, ginabayad ini sang MORE Power sa gobyerno kaangay sang Bureau of Internal Revenue (BIR).
Suno kay Fantilaga, sa mga konsumidor nga nagareklamo sang nagataas nila nga balayran, pat-od nga ginpang-ilisan nila ang kapin 11 tubtob 13,000 ka gubaon kag wala nagahulang nga meters sang kuryente rason nga mas digital kag accurate na ang ila reading.
Ginpahayag sang natungdan nga nagakadapat magbayad sa nagakaigo nga due date ang isa ka konsumidor sang iya nga bill bangud may cut off kag due date man ang MORE Power sa pagbayad sang bill sa mga supplier nga ginakuhaan sang kuryente.
Sa mga may dugang nga pamangkot kag inquiries, mahimo makig-angot sa official Facebook page sang MORE Power Iloilo ukon magkontak sa 09176375214.
