Nagdangat sa 40,444 ang numero sang mga naglapas sa minimum public health standards sa syudad sang Iloilo.
Ang mga ginlapas nga health protocols sa syudad, ang ginalakipan sang indi pagsuksok sang face mask, paglapas sa social ukon physical distancing kag indi insakto nga pagsuksok sang faceshield.
Sa interview sang Bombo Radyo kay Police Captain Shella Mae Acanto Sangrines, hepe sang Iloilo City Police Station No. 1 kag spokesperson sang Iloilo City Police Office (ICPO), iya ginpahayag nga ang 40,444 nga data sang violators sa mga health protocol, ang narekord halin sang Enero tubtob Mayo 2021.
Suno kay Sangrines, nagpanguna ang distrito sang La Paz, Iloilo City nga may 8,353 nga numero sang violators, distrito sang Iloilo City Poper nga may 7,436, distrito sang Molo, Iloilo City nga may 6,600, distrito sang Jaro, Iloilo City nga may 6,261, distrito sang Mandurriao, Iloilo City nga may 5,639, Arevalo, Iloilo City nga may 5,318 kag 833 nga violators sang health protocol nga nadakpan sang Motor Patrol Unit sang ICPO sa nanuhay-tuhay nga bahin sang syudad sang Iloilo.
Ginpahayag ni Sangrines nga ang kadam-an sa mga nadakpan ang ginmultahan sang P1,000 kag ang iban naman ang ginhatagan sang warning.
Dugang sang natungdan, ginalantaw man nila ini nga isa sa pinakadako nga rason sa padayon nga pagtimbuok sang kaso sang COVID-19 sa syudad sang Iloilo.
Samtang, ginpasalig sang La Paz Police Station ang mas istrikto kag mas hugot nga pagpatuman sa mga pumuluyo sang minimum public health standards.
Ini matapos nagpanguna ang distrito sang La Paz, Iloilo City sa may pinakataas nga numero sang mga naglapas ukon nagbayolar sa health protocols.
Sa interview sang Bombo Radyo kay Police Major Jose Val Ladublan, hepe sang La Paz Police Station, iya ginpahayag nga indi na sila maghatag pa sang pasensya sa mga indibidwal nga madakpan nga wala nagasunod sa health protocols.
Suno kay Ladublan, kaupod ang Compliance Team sang Iloilo City Government, nagapadayon sila sa paglibot kag pagbantay sa mga pumuluyo sang La Paz, Iloilo City agud siguraduhon nga nagatuman ang tanan sa pagpractice sang minimum public health standards.
