Nagapanawagan sang pagbululigay ang Jaro Police Station sa mga pumuluyo sang distrito sang Jaro Iloilo City sa pagtuman sang minimum public health standards.
Ini matapos nangin ikaduha ang distrito sang Jaro, Iloilo City sa may pinakataas nga numero sang mga naglapas ukon nagbayolar sa health protocols.
Sa interview sang Bombo Radyo kay Police Captain Eduardo Siacon, hepe sang Jaro Police Station, iya ginpahayag nga nakarekord ang distrito sang Jaro, Iloilo City sang 6,261 nga numero sang violators sa health protocols umpisa sang Enero tubtob Mayo 2021.
Suno kay Siacon, bangud sini, hugot ang ila nga pangabay sa mga pumuluyo sang distrito sang Jaro, ilabi na sa mga ginikanan nga ipahanumdom sa mga kabataan ang importansya sang pagsunod sa minimum public health standards ilabi na nga nagasaka pa ang kaso sang COVID-19 sa syudad.
Dugang pa sang pulis, nagahingyo man sila sa tanan nga ipaiway ang pag-inom sang makahulubog nga ilimnon.
