Nagpatigayon sang hublag protesta sa sulod sang walo ka oras batok sa gobyerno ang kapin 30,000 ka mga nurses, midwives kag iban pa nga health workers sa New Zealand.
Ini matapos ginbasura sang New Zealand Nurses Organisation (NZNO) ang ginpropose sang District Health Board nga pataasan lamang sang 1.4 percent ang sweldo sang mga health worker.
Suno kay Bombo International Correspondent Tess Peeters direkta sa New Zealand, 17 percent nga increase sa sweldo ang ginahingyo sang mga health worker apang makapila na nagpamalibad ang gobyerno nga indi nila ini masarangan bangud man sa COVID-19 pandemic.
Bangud sini, nagapangatubang subong sang pagpakamalaot si Prime Minister Jacinda Ardern bangud sa ginapahayag kulang nga inisyatibo sa paghatag sang solusyon sa nasambit nga isyu.
Ginpahayag ni Peeters nga ang linibo ka mga health worker, ang nagmartsa sa mga dalanon bitbit ang mga placard samtang ang iban sa ila ang nagtumpok sa mga park sagwa sang mga ospital.
Ginapahayag nga ang mga health worker nga nagpatigayon sang hublag protesta, amo ang madugay na nga nagaeksperyensya sang ‘burn out’ tuga sang nagalala nga COVID-19 pandemic.
Bangud diri, hugot nila nga ginahingyo nga mahatagan man lamang sila sang hazard pay ukon pagsaka sang sweldo bangud ginarisgo nila ang ila kabuhi agud makaserbisyo sa mga pumuluyo.
