Patay ang driver matapos malapakan sang pangulihe nga bahin sang royda sang truck nga iya man ginamaneho sa Barangay San Antonio, San Miguel, Iloilo.
Ang biktima amo si Galajad Salarda, 47, kag residente sang Barangay Igtambo sa nasambit nga banwa.
Sa interview sang Bombo Radyo kay PLt. Rene Mercado, hepe sang San Miguel Municipal Police Station, iya ginpahayag nga padulong na kuntani sa Igtambo si Salarda sang napatay ang makina sang truck.
May yara man sang kaupod sa truck ang biktima nga isa ka menor de edad.
Suno kay Mercado, bangud sa kakulba, naglumpat ang driver sa truck agud kuntani maglikaw sa aksidente apang sa baylo nga makaluwas, nalapakan pa ini sang royda.
Pahayag sang hepe, nakaluwas naman ang menor de edad bangud wala ini naglumpat kag nagpabilin lang sa sulod sang truck.
