Ginapreparahan na sang Liga ng mga Barangay sa Syudad sang Iloilo ang plano nga pagpatigayon sang barangay clustering para sa COVID-19 vaccination.
Sa interview sang Bombo Radyo kay Punong Barangay Roberto Niño Jr. sang Calumpang, Molo, Iloilo City kag spokesperson sang Liga ng mga Barangay sa syudad, iya ginpahayag nga bag-o pa man nag-umpisa ang Vaccination rollout , naghatag na sang suhestyon ang COVID-19 Team sang Iloilo City Government may kaangtanan sa barangay clustering para sa pagpatigayon sang pagpabakuna.
Suno kay Niño, sa barangay clustering, magapangita kag magatukod sila sang kapin apat ka vaccination site sa kada distrito sang syudad agud nga mas mangin organisado ang COVID-19 vaccination.
Apang sa subong suno kay Niño, padayon pa nila ini nga ginatun-an kag ginaplanuhan sa diin igapatuman ini kun mag-abot na ang tanan nga bakuna nga ginprocure sang syudad.
Matandaan nga liwat na naman nga nangin isyu ang ginapahayag ‘wala sistema’ kag ‘indi organisado’ nga COVID-19 vaccination sa isa ka unibersidad sa syudad sang Iloilo.
