Wala sang bakuna nga makahatag sang 100% protection batuk sa COVID-19 apang nagapalikaw ini nga maglala ang balatian kun matapikan sang virus.
Sa interview sang Bombo Radyo kay Dr. Ella Mae Divinagracia, Infectious Disease Specialist, iya ginpahayag nga kinahanglan maghulat ang indibidwal sang duha ka semana agud mangin fully vaccinated kag ma-achieve ang full protection batuk sa severe COVID-19 symptoms.
May mga hitabo man kun kaisa nga apisar kumpleto na sa bakuna, matapikan sa gihapon sang virus apang ang ini nga mga kaso ang mild lamang kag indi kritikal.
Samtang may kaangtanan sa delta variant, suno kay Divinagracia, may yara sang 13 ka kaso nga nadetect sa pungsod.
Apang sa subong, wala pa sang community transmission sang ginapahayag mas makalalaton nga variant sang COVID-19.
Ini ang una nga nadetect sa India kag ginapahayag nga 60 percent nga mas infectious sa Alpha variant kag nangin rason sang pagsurge sang mga kaso sa iban nga mga pungsod.
Importante pahayag ni Divinagracia nga mahangpan sang pumuluyo kun paano maproteksyonan ang lawas ilabi na kun yara sa vaccination site.
Suno sa natungdan, sa lugar nga may madamo sang tawo, may yara gid sang virus nga mahimo maglaton sa isa ka tawo kun indi ini mangin responsable sa iya mismo kaugalingon.
Panugyan ni Divinagracia, kun magpadulong man sa vaccination site, responsibilidad na sang tawo nga magdala sang panaming kaangay sang face mask, face shield kag alcohol.
