Padayon ang vaccination program sa Indonesia sa pihak sang pagpositibo sa COVID-19 sang 350 ka mga doctor kag medical workers apisar nabakunahan na gamit ang China made Sinovac vaccines.
Suno kay Bombo International Correspondent Stella Marie Arungayan direkta sa Indonesia, kadam-an sa mga medical workers ang asymptomatic kag naka-home quarantine naman.
Apang madamo subong ang na admit sa mga ospital bangud sa pagbatyag sang mataas nga hilanat.
Pahayag ni Arungayan, posible nga Delta variant ang nagtapik nga virus sa mga healthcare workers sa diin ini ang ginapatihan nga mas makalalaton.
Ang mga medical personnel amo ang una nga ginbakunahan sa Indonesia sang nag-umpisa ang ila inoculations sang Enero.
Una na nga ginpahayag sang Indonesian Medical Association nga kadam-an sa mga nagpositibo sa COVID-19 amo ang mga nakabaton sang vaccine nga gindevelop sang Chinese biopharmaceutical company Sinovac.
Nahibaluan nga subong nga bulan lang sang Hunyo gin-aprubahan sang World Health Organization (WHO) ang emergency use sang Sinovac vaccine.
