Nagtatak sa paminsaron sang isa ka doctor ang ginpahayag sang iya amay nga indi gid magpasugot nga may anak ini nga indi makatapos sa pag-eskwela.
Si Dr. Antonio Reyes ang may yara sang lima ka mga kabataan, apat ang lalaki nga ginalakipan sang tatlo ka mga medical doctors kag isa ka veterinary doctor samtang ang naga-isahanon nga babaye ang isa ka nurse kag nagproceed bilang Interior Designer bangud amo ini ang iya nga passion.
Sa interview sang Bombo Radyo kay Dr. Reyes, iya ginpahayag nga gintinguhaan man niya nga impluwensyahan ang iya mga kabataan sa iya pagka-doctor.
Apang antes gin-engganyo ang mga anak, suno kay Dr. Reyes, ginpabay-an man niya anay ang mga ini nga ma-expose sa nagakalain-lain nga field agud mahibaluan kun ano gid ang ila luyag.
Pahayag sang doctor, ang iya nga misis ang isa man sadto ka nurse apang nadesisyonan sini nga magresign agud matutukan ang ila mga kabataan.
Bilang isa ka amay, ginatinguhaan ni Dr. Reyes nga masami siya available kun kinahanglan siya sang iya pamilya.
Apang may yara sang isa ka bes nga ang iya anak nga subang ang nagkadto sa iya nga clinic kag nagpa-set sang appointment agud lang nga ma-istorya ang iya amay.
Didto kag narealisar man ni Dr. Reyes nga posible masako na gid siya ukon wala na sang oras sa iya kabataan rason kun ngaa nahimo sang iya subang nga anak nga magpa-set pa sang appointment.
Apang sang ulihe, suno kay Dr. Reyes, nahangpan man sang iya anak ang katungdanan sang isa ka doctor bangud doctor naman ini sa subong.
Importante lang pahayag niya amo nga mapabilin ang komunikasyon sang pamilya kag indi gid pagkalimtan nga magpangamuyo.
