Gin-athag ni Iloilo Governor Defensor Jr. nga gintamdan sang probinsya sang Iloilo ang omnibus guidelines sang Inter-Agency Task Force on Emerging Infectious Diseases (IATF-EID) kag Department of Trade and Industry (DTI) antes ginpahalugan ang protocol sa probinsya apisar napaidalom ini sa Modified Enhanced Community Quarantine (MECQ) status.
Sa Executive Order No.200 nga gin-isyu ni Iloilo Governor Defensor, nakasaad nga ginapahanugutan ang 30% on-site capacity nga operasyon sang beauty salons, beauty parlors, barbershops, kag nail spas, PROVIDED, nga nagasuksok sang face mask ang mga kustomer kag ang mga service providers samtang nakapaidalom ang probinsya sa MECQ status tubtob sa Hunyo 30.
Ang nasaad sa amo nga executive order, ang santo sa DTI Memorandum Circular No. 21-15 Series of 2021.
Apang una na gin-athag ni DTI Iloilo Provincial Director Judith Degala sa interview sang Bombo Radyo nga ang latest issuance amo ang DTI Memorandum Circular (MC) No. 21-19, series of 2021 ukon ang ON-SITE OPERATIONAL CAPACITY OF BUSINESS ESTABLISHMENTS, PERSONS OR ACTIVITIES ALLOWED TO OPERATE IN AREAS PLACED UNDER GENERAL COMMUNITY QUARANTINE WITH HEIGHTENED RESTRICTIONS AND OTHER COMMUNITY QUARANTINE CLASSIFICATIONS.
Sa idalom sang sini nga issuance, wala ginapahanugutan sa mga lugar nga naka-MECQ ang mga personal care services kaangay sang massage parlors, sauna, facial care, kag waxing.
Samtang, santo naman sa pagsulundan sang IATF, sa mga lugar nga napaidalom sa MECQ status, ginadumilian ang operasyon sang Personal care services nga ginalakipan sang beauty salon, beauty parlors, nail spas, medical aesthetic clinics, cosmetic ukon derma clinics, reflexology, aesthetics, wellness and holistic centers, massage therapy, sports therapy establishments, kag establishments nga nagaprovide sang tanning services, body piercings, pagpa-tattoo, kag home service para sa nasambit nga mga aktibidad.
Sa interview sang Bombo Radyo kay Iloilo Governor Defensor Jr., iya ginpahayag nga ginareconcile sang probinsya ang pagsulundan sang IATF kag DTI antes nagpagwa sang guidelines.
Suno kay Defensor, nahibal-an sang probinsya ang pagsulundan sang national government kag DTI antes nagpagwa sang pagsulundan kag nakit-an nga wala man sang problema kun pahunugutan ang pagpabukas sang beauty salons, beauty parlors, barbershops, kag nail spas PROVIDED nga sundon ang tanan nga protocol.
