ILOILO CITY- Patay ang security guard sang Governor Niel D. Tupas Sr. District Hospital sa Barotac Viejo, Iloilo matapos nga gintiro ang iya kaugalingon samtang yara ini sa duty.
Ang biktima amo si Charles Centillas, 23-anyos kag residente sang Barangay Santiago, Barotac Viejo, Iloilo.
Sa interview sang Bombo Radyo kay Police Major Kenn Albert Lepsia, hepe sang Barotac Viejo Municipal Police Station, iya ginpahayag nga base sa ila imbestigasyon, duha na ka beses sadto nga nagtuyo nga maghikog ang biktima apang napunggan ini sang iya mga himata.
Suno kay Lepsia, posible nga isa sa mga posible nga kabangdanan sang paghikog sang biktima amo ang pag-upod sang iya kalive-in partner sa iban nga lalake.
Pilas sa sag-ang nga naglapos sa iya nga ulo ang naangkon sang biktima nga amo ang gintunaan sang iya kamatayon.
Narekober naman ang 9mm nga gin-gamit niya sa pagluthang sa kaugalingon.
Sa subong, nagapadayon pa ang imbestigasyon sang otoridad.
