Makahalunusbo ang kamatayon sang duha ka-tuig nga bata nga lalaki matapos nahulog sa septic tank sa Barangay Tacbuyan, Estancia, Iloilo.
Sa interview sang Bombo Radyo kay Police Lt. Edward Villanis, deputy chief of police sang Estancia Municipal Police Station, iya ginpahayag nga ginabanta las 6:00 sang hapon natabo ang insidente sang ginapahayag wala mabantayan sang maayo sang iloy sang bata ang iya nga anak bangud nangin masako ini sa pag-akomodar sa iya nga bisita nga abyan sa diin ‘nagselfie-selfie’ pa ang mga ini.
Suno kay Villanis, nagahampang ang biktima sa gwa sang ila balay sang nahulog ini sa septic tank.
Dugang pa sang pulis, naglawig pa sang lima ka oras ang pagpangita sa bata bag-o ini nasapwan sa septic tank nga lapsi na kag wala na sang kabuhi.
Santo sa pamilya sang bata, indi na nila pagpaidalom sa autopsy examination ang lawas sang biktima sa diin nagapati sila nga wala man sang foul play nga natabo.
