Gin-ako sang alkalde sa syudad sang Iloilo nga nagsabtanay kag nagtaasay sila sang tingog ni Department of Health Secretary Francisco Duque III.
Ini ang may kaangtanan sa ginpalab-ot ni Treñas kay Duque nga mga problema nga ginaatubang sang syudad kaangay sang kulang nga COVID-19 vaccines, kautangan sang PhilHealth sa mga ospital kag iban pa.
Sa interview sang Bombo Radyo kay Iloilo City Mayor Jerry Treñas, iya ginpahayag nga sang ginpalab-ot niya kay Duque ang mga concern sang syudad, nagpamalibad ini nga may yara ini sang madamo nga gina-atendir nga pagsurge sang COVID-19 sa iban pa nga mga lugar sa pungsod.
Suno kay Treñas, nagakadapat nga nalakip man ang Iloilo City sa gina-atendir sang national government bangud nagatimbuok man ang kaso sang COVID-19 sa syudad kag puno na ang mga ospital.
”Siling ko ti, atendira anay ang mga surge, pero ti may surge man kami di sa Region VI. Ano siling ko, hambalon ko ang tawo nga indi ka anay mapatay kay gina-atendir pato ni Secretary Duque ang iban nga surge? Kay hambal ya ga surge man to kuno sa Mindanao, sa Cagayan De Oro, sa Davao…sa diin pato. Ti tani gin-istorya ya man si Harry Roque para maghambal si Harry Roque daw insakto man bala tani…HAY SI HARRY NI…”
Indi patas suno sa alkalde nga sa iban nga lugar sa pungsod, mas madamo ang gina-allocate nga mga bakuna.
Pahayag ni Mayor Treñas, matapos nagtaasay ang ila nga tingog ni Duque, sang ulihe gin ulo-ulohan man siya sang Health Secretary.
Dugang pa sang natungdan, magahulat na lamang ang syudad kun san-o maabot ang dugang nga mga bakuna nga i-allocate sang national government.
Matandaan nga nagpangayo man sang bulig sa Mayor Treñas kay Presidential Spokesperson Harry Roque para sa dugang nga COVID-19 vaccines sa Iloilo City agud matapna ang nagapadayon nga pagsaka sang kaso sang virus sa syudad.
Apang ang nangin sabat ni Roque kay Treñas amo nga ang pagsunod sang pumuluyo sa mga health protocol ang mayor nga solusyon agud malikawan ang pagtimbuok sang COVID-19.
