‘Mask, Iwas kag Hugas’.
Ini ang ginsabat ni Presidential Spokesperson Harry Roque sa paghingyo ni Iloilo City Mayor Jerry Treñas sang dugang nga COVID-19 vaccines agud matapna ang nagasaka nga kaso sang virus sa syudad sang Iloilo.
Sa iya press briefing, ginpahayag ni Roque nga masami nga nagapadala sang mensahe kag nagapakig-angot sa iya si Treñas may kaangtanan sa mga problema sang syudad kag paghingyo sini sang dugang nga COVID-19 vaccines.
Suno kay Roque, kabahin lamang ang bakuna sa pila ka mga solusyon agud malikawan ang pagtimbuok sang COVID-19.
Apang ang mayor nga rason suno kay Roque sang paglapta sang nasambit nga virus, amo ang kapaslawan sang mga tawo sa pagsunod sa mga health protocol kaangay sang pagsuksok sang facemask, indi pagwa sa mga balay kag paghugas ukon masami nga pagsanitize sang mga kamot.
Nagapati si Roque nga ang isa sa pinaka-importante nga solusyon sa pagtapna sang COVID-19, amo ang sundon ang tanan nga ginapatuman nga protocol sa pagpakig-away batok sa nasambit nga virus.
Dugang pa niya, may kaangtanan sa COVID-19 vaccines nga ginahingyo ni Treñas, nagmando na si Presidente Rodrigo Duterte nga hatagan sang dugang nga mga bakuna ang mga lugar nga may madamo nga kaso sang virus.
ANG SABAT NI ILOILO CITY MAYOR JERRY TREÑAS
”Kinahanglan pinsaron ya man kun ano ang ginahambal ya.”
Ini ang dismayado nga sabat ni Iloilo City Mayor Jerry Treñas may kaangtanan sa pahayag ni Presidential Spokesperson Harry Roque.
Sa press briefing ni Roque, ginsabat niya ang hingyo ni Mayor Treñas para sa dugang nga COVID-19 vaccines bangud sa padayon nga pagtaas sang kaso sang virus sa syudad sang Iloilo.
Ginpahayag ni Roque nga ang rason sang pagtimbuok sang kaso sang COVID-19, amo ang kapaslawan sang mga pumuluyo sa pagsunod sa health protocols.
Sa interview sang Bombo Radyo kay Treñas, iya ginpahayag nga kaangay nga mas madasig pa ang baba ni Roque kaysa sa iya nga utok.
Suno kay Treñas, abyan man niya si Roque apang nagakadapat nga paminsaron anay sini ang iya mga tinaga nga ginabuy-an.
”Si Harry kun kis-a maayo man ni siya galing mas madasig baba ya sa utok ya!”
Ini bangud indi patas nga makabig suno sa alkalde ang allocation sang COVID-19 vaccines.
Sa Quezon City suno kay Treñas, 600,000 ka doses sang mga bakuna ang gin-allocate apang sa bug-os nga Rehiyon VI, 300,000 doses lang tanan ang ginhatag.
Pahayag ni Mayor Treñas, isa lamang ka syudad ang Quezon City apang tuman kadamo ang ginhatag sa ila nga mga bakuna.
Samtang ang 300,000 doses sang COVID-19 vaccines nga gindonar para sa bug-os nga Rehiyon VI, ang tungaon pa sang anom ka mga probinsya kag duha ka highly urbanized city.
Nagakadapat suno kay Treñas nga binag-binagon anay ini ni Roque.
Gin-ako man sang alkalde nga bangud sa ginpahayag ni Roque, nagaduha-duha na siya sa pagsuporta diri sa tion nga magpadalagan man ini sa pagka-senador.
