Pahalinon sa trabaho ang duha ka police trainees matapos nagpahubog sa syudad sang Iloilo, samtang nagasuksok pa sang uniporme.
Ang duha ka police trainees amo sanday Jacob John Ondrada kag John Anthony Lubria, lunsay nagraduate sa Regional Training School sang Marso 2021 kag yara pa sa Field Training Program.
Sa interview sang Bombo Radyo kay Police Col. Joem Malong, spokesperson sang Police Regional Office (PRO) VI, iya ginpahayag nga natabo ang pag-inom-inom sang duha ka pulis sang Hunyo 5, sa diin ginapatuman pa ang liquor ban sa syudad sang Iloilo sa idalom sang Modified Enhanced Community Quarantine (MECQ) status.
Suno kay Malong, tuga sang kahulugbon, natulugan pa sanday Ondrada kag Lubria sa sulod sang ginsakyan nila nga taxi .
Sang yara na sa Diversion Road, Mandurriao, Iloilo City, may nakit-an ang driver sang amo nga taxi nga mga pulis nga nagapatrolya sa dalanon rason nga ginhingyo niya ang mga ini nga pukawon ang iya duha ka pasahero nga nakasuksok sang camouflage green nga PNP-Field Service Uniform.
Matapos sini, ginpahibalo sang Mobile Patrol Unit sang Iloilo City Police Office ang Regional Learning and Doctrine Development Division sa diin na-assign ang duha ka police trainees.
Gin-ako naman sang duha ka pulis nga off duty nila sang nagpatigayon sila sang drinking session sa Oton, Iloilo.
Bangud gin-ako sang police trainees nga nagpahubog pa sila samtang nakasuksok sang uniporme sang PNP, gilayon nga nagmando si PRO VI Director Police Brigadier Gen. Rolando Miranda nga pahalinon ang mga ini sa trabaho.
Dugang pa ni Malong, ipaidalom na sa subong sa termination proceedings ang duha ka pulis.
Nahibaluan nga maangkon sang isa ka pulis ang permanency sa police service, sa tion nga makompleto kag matapos sini ang iya Public Safety Basic Recruit Course kag Field Training Program.
