Ginsapol ni Iloilo Governor Arthur Defensor Jr. ang lima ka banwa sa probinsya sang Iloilo nga may yara sang pagsurge sang kaso sang COVID-19.
Sa interview sang Bombo Radyo kay Atty. Suzette Mamon, Provincial Administrator sang Probinsya sang Iloilo, iya ginpahayag nga ang lima ka banwa nga natumod nga may pinakataas nga kaso sang virus amo ang mga masunod:
- Oton, Iloilo;
- Pavia, Iloilo;
- Sta, Barbara, Iloilo;
- Leganes, Iloilo; kag
- Guimbal, Iloilo
Suno kay Mamon, ginsapol sang gobernador via Zoom ang local chief executives sang lima ka banwa.
Katuyuan sini suno sa iya nga maplanuhan kun paano macontain ang pagtimbuok sang kaso sang virus sa nasambit nga mga banwa.
Ginpahayag ni Mamon nga kadam-an sa ginhalinan sang kaso sang COVID-19 sa lima ka mga banwa amo ang mga tawo nga nalakip sa A4 priority group.
Ang nasambit nga priority group amo ang ginalakipan sang mga indibidwal nga nagatrabaho ukon assigned sa field work.
Bangud sini suno kay Mamon, ginaplanuhan naman sang probinsya nga unahon sa pagpabakuna batok sa COVID-19 ang mga nalakip sa A4 priority group.
