Dismayado ang pila ka mga jeepney operators sa Syudad sang Iloilo sa programa nga gintanyag sa ila sang Land Transportation Franchising and Regulatory Board (LTFRB).
Matandaan nga humalin sang nag-umpisa sang Abril 19 ang Libre Sakay sa idalom sang Service Contracting Program sang LTFRB, nagawangal na ang driver sang traditional nga mga jeep bangud ginapahayag ‘daw ginapatay’ ang ila pangabuhian bangud wala na sang nagasakay sa ila.
Bangud sini, may yara sang Service Contracting Program nga gintanyag ang LTFRB para sa mga traditional nga jeepney.
Katuyuan sini nga maswelduhan man ang jeepney operators sa syudad sang Iloilo pinaagi sa pagrekord sang patak sang ila kilometro sa pagbyahe.
Sa interview sang Bombo Radyo kay Rolly Antenor, isa ka jeepney operator sa idalom sang Iloilo City Loop Alliance of Jeepney Owners and Drivers Association (ICLAJODA), iya ginpahayag nga nagreklamo sila sa LTFRB bangud tubtob subong wala pa sa gihapon nag-abot ang P4,000 nga tanyag sang ahensya agud ibakal nila sang cellphone sa diin nila mahimo ma-access ang application sang LTFRB.
Sa nasambit nga online application, diri marekord ang profile sang driver, pangalan, ruta kag distansiya sang byahe k nga mangin basehan sang ila nga sweldo.
Suno kay Antenor, bangud wala sila sa gihapon nakabaton sang P4,000 nga tanyag sang LTFRB agud ibakal sang cellphone, nagmato-mato na lamang sila bakal sini agud nga ma-access ang online application.
Apang suno kay Antenor, wala man nagagana ang online application sang LTFRB sa diin, wala nagagwa ang ila pangalan, lain ang nagagwa nga ruta sang byahe kag sala ang rekord sang distansya sang ila byahe.
Nagapanawagan ang natungdan sa LTFRB nga kuntani hatagan man sila sang igtalupangod may kaangtanan sa ila reklamo.
DEPENSA SANG LTFRB REGION VI
Samtang, depensa naman sang Land Transportation Franchising and Regulatory Board (LTFRB), yara sa central office ang tanan nga monitoring may kaangtanan sa online application nga ginagamit sang traditional jeepney operators.
Sa interview sang Bombo Radyo kay Engr. Joshua Gaquit, Planning Officer III sang LTFRB Region VI, iya ginpahayag nga nagakadapat maghimo sang certification ang pila ka mga driver kaangot sa indi insakto nga rekord sang online application kag patak sang ila kilometro.
Suno kay Gaquit, nagakadapat man nga sulaton kag i-rekord sang mga driver ang insakto nila nga dalagan sang kilometros kag ilakip sa ila certification.
Pahayag niya, ang mahimo lamang nila amo ang mapalab-ot sa central office ang tanan nga reklamo sang mga jeepney operator lakip na ang ila certifications.
May kaangtanan naman sa P4,000 nga ginpasalig sang LTFRB, suno kay Gaquit mahimo nga wala pa natapos sang central office ang proseso sini nga cash assistance para sa ibakal nga cellphone sang mga driver.
Apang pahayag niya, kun may yara na sang cellphone ang mga driver nga mahimo maka-install sang online application sang LTFRB kag may Global Positioning System (GPS), mahimo nga indi na ang mga ini magbakal sang bag-o nga cellphone kag kwartahon na lamang ang P4,000.
