Ginpabalik anay sa Field Training Program ang kontrobersyal nga duha ka police trainees nga nagpahubog samtang nagasuksok pa sang uniporme.
Ang duha ka police trainees nga nagpahubog amo sanday Jacob John Ondrada kag John Anthony Lubria, lunsay nagraduate sa Regional Training School sang Marso 2021 kag yara pa sa Field Training Program.
Matandaan nga natabo ang pag-inom-inom sang duha ka pulis sang Hunyo 5, sa diin ginapatuman pa ang liquor ban sa syudad kag probinsya sang Iloilo sa idalom sang Modified Enhanced Community Quarantine (MECQ) status.
Sa interview sang Bombo Radyo kay Police Brigadier Gen. Rolando Miranda, Director sang Police Regional Office (PRO) VI, iya ginpahayag nga nagapadayon pa ang termination process sang duha ka police trainees.
Suno kay Miranda, ginabanta duha ka bulan pa ang kalawigon sang nasambit nga proseso sa diin posible mapahalin sila sa serbisyo.
Pahayag pa niya, bangud wala pa man nagwa ang resulta sang termination process sang duha ka police trainees, nagakadapat nga padayunon anay sang mga ini ang ila nga katungdanan sa Field Training Program.
Samtang, kun makumbinse sang duha ka police trainees ang termination board nga ‘worthy’ sila sa gihapon nga magtinir sa serbisyo, mahimo nga indi sila mapahalin.
Sa interview sang Bombo Radyo kay Police Lt. Col. Joem Malong, spokesperson sang PRO VI, iya ginpahayag nga may ‘due process’ ang pagpahalin sa duha ka police trainees sa serbisyo.
Suno kay Malong, sa termination process sang duha ka pulis, hatagan sila sang kahigayunan nga ipaathag ang ila nga bahin .
Apang suno kay Malong, sa tion nga mapamatud-an naman ang bayolasyon kag kapaslawan sang duha ka pulis, pat-od nga pahalinon sila sa serbisyo.
Nahibaluan nga una na gin-ako sang police trainees nga nagpahubog sila samtang nakasuksok pa sang camouflage green nga PNP-Field Service Uniform.
