Nagsabat na si Presidential Spokesperson Atty. Harry Roque may kaangtanan sa ginbuy-an nga tinaga sang alklade sang Iloilo City nga mas madasig pa ang baba niya kumpara sa iya utok.
Matandaan nga nagpangayo sang bulig si Iloilo City Mayor Jerry Treñas kay Roque para sa dugang nga COVID-19 vaccines sa Iloilo City agud matapna ang nagapadayon nga pagsaka sang kaso sang virus sa syudad.
Apang ang nangin sabat ni Roque kay Treñas amo nga ang pagsunod sang pumuluyo sa mga health protocol ang mayor nga solusyon agud malikawan ang pagtimbuok sang nasambit nga virus.
Una na ginpahayag ni Mayor Treñas sa Bombo Radyo nga tuman ka importante ang pagpabakuna batok sa COVID-19 bangud madamo na ang ginabawian sang kabuhi sa syudad tuga sang nasambit nga balatian.
Indi man patas suno sa alkalde ang allocation sang COVID-19 vaccines sang pungsod.
”Si Harry kun kis-a maayo man ni siya galing mas madasig baba ya sa utok ya!,” pahayag ni Treñas.
Suno naman kay Presidential Spokesperson Atty. Harry Roque, nakaistorya na sila liwat ni Mayor Treñas sa diin ginalantaw niya nga pagpang-angga lamang sang alkalde ang mga ginbuy-an sini nga mga tinaga.
Pahayag niya, naga-intindihanay na sila sang Iloilo City Mayor bangud nahibaluan man sini nga isa man siya ka Ilonggo.
Ginpanindugan ni Roque nga bisan habuyon pa siya sang matuod nga bato, iduso niya sa gihapon nga ang pagsunod sa health protocols kaangay sang pagpanghugas sang mga kamot, pagmaskara kag pag-obserba sang physical distancing ang makapauntat sang pagtimbuok sang kaso sang COVID-19.
Ini man suno sa iya ang pinaka-epektibo nga pamaagi kag stratehiya agud nga matapna ang COVID-19.
”I have spoken to Mayor Treñas, as I said, lambing po iyan, because he knows I am Ilonggo myself. But that is something I have to say to everyone. Siguro po nakakairita, but it’s the truth. And maski batuhin na po ako ng tunay na bato, sasabihin ko parin po iyan. Habang walang containment ‘MASK, HUGAS, IWAS’ pa rin sa buong Pilipinas, dahil iyan po talaga ang stratehiya.
Sa pihak sini, ginpahayag man ni Roque nga tubtob pa sa Hunyo 30 ang pagban sang pungsod sa India, Oman, United Arab Emirates (UAE), Sri Langka, Bangladesh kag Pakistan.
Bangud sini, hugot man nga nagapangabay sang paghangop si Roque sa publiko.
