”Bon Voyage”
Ini ang mensahe ni Iloilo City Mayor Jerry Treñas kay Department of Health (DOH) Region 6 Director Dr. Emilia Monicimpo nga manugretiro na.
Matandaan nga nagpadala sang sulat ang alkalde kay Monicimpo agud mangayo man sang paathag sa record sang COVID-19 vaccines nga gin-allocate sa syudad sang Iloilo.
Apang tubtob subong, wala pa sa gihapon nakabaton si Treñas sang reply halin kay Monicimpo.
Sa interview sang Bombo Radyo kay Mayor Treñas, iya ginpahayag nga humalin nagtimbuok ang kaso sang COVID-19 sa syudad, wala na niya naka-istorya si Monicimpo.
Suno kay Treñas, humalin man sang nagtaas ang kaso sang virus sa syudad, wala naman sila nakaagi kit-anay ni Monicimpo.
Sa mga zoom meeting niya kaupod ang DOH suno kay Treñas, ang masami lang nga naga-attend amo si Dr. Jane Juanico ang COVID-19 spokesperson kag pinuno sang Infectious Disease Section sang DOH Region VI.
Dugang pa sang alkalde, kun magaretiro na si Monicimpo sa DOH, nagakadapat nga ‘the earlier, the better’.
