Una na nakabaton sang reklamo ang Oton Municipal Police Station may kaangtanan sa duha ka police trainee nga nagpahubog sa Oton, Iloilo.
Ang duha ka police trainees nga nagpahubog amo sanday Jacob John Ondrada kag John Anthony Lubria, lunsay nagraduate sa Regional Training School sang Marso 2021 kag yara pa sa Field Training Program.
Sa interview sang Bombo Radyo kay Police Captain Robert Jayson Pancha, hepe sang Oton Municipal Police Station, iya ginpahayag nga sang Hunyo 5, may isa ka concern citizen nga nagpalab-ot sang impormasyon sa ila nga may yara sang duha ka hubog nga pulis nga naka-uniporme kag nagabantay sang jeep sa Barangay Cabanbanan, Oton, Iloilo.
Suno kay Pancha, gilayon nila nga gintsikyar ang ila mga pulis kun may yara sang nagwa kag nag-inom-inom.
Apang nakumpirma ni Pancha nga wala sa ila sang may nag-inom sang makahulubog nga ilimnon bangud nahibal-an man nila nga ginapatuman ang liquor ban sa probinsya sang Iloilo.
Ginpat-od ni Pancha nga sa tion nga makabaton sila sang mando nga imbesitigaran ang duha ka police trainee, nakahanda sila nga magresponde.
Kun kinahanglan man suno sa iya nga sila ang magpasaka sang kaso sa duha ka police trainee nga nagpahubog, indi man sila magduha-duha diri.
Maathag suno kay Pancha, nga una na ginlapas sang duha ka police trainee ang liquor ban nga ginapatuman sang probinsya sang Iloilo sa idalom sang Modified Enhanced Community Quarantine (MECQ) status sa diin nakasuksok pa sang police uniform ang duha ka pulis sang nagpahubog.
