Ginbali sang Department of Health (DOH) ang pahayag ni Iloilo City Mayor Jerry Treñas nga gamay lamang nga COVID-19 vaccines ang nabaton sang syudad.
Una na nga ginpahayag ni Mayor Treñas nga 66,000 lamang ang nabaton sang Iloilo City ipaanggid sa ginapahayag sang DOH nga 84,000 doses sang bakuna nga ginhatag sa syudad.
Apang nagapanindugan ang ahensya nga kumpleto ang gindeliver nga 84,000 doses sa Iloilo City.
Suno kay DOH Undersecretary Myrna Cabotaje, ang iban nga mga bakuna ang wala gindiretso sa local government units sa baylo, ginhatag ini direkta sa mga ospital.
Nagpahayag man si Treñas nga kinahanglan magpadala man sang madamo nga COVID-19 vaccines ang DOH sa Iloilo City kag indi lang magfocus sa Metro Manila kag walo ka iban pa nga mga lugar.
Apang pahayag ni Cabotaje, magapabilin nga prayoridad sang vaccine doses ang NCR +8 bangud sa mataas nga numero sang COVID-19 cases kag populasyon.
