Patay ang jail officer sang Bureau of Jail Management and Penology (BJMP) -Ungka, Jaro, Iloilo City matapos magbunggo-anay ang iya ginamaneho nga kotse kag ang 12-wheeler truck sa Circumferential Road sa Barangay Tacas, Jaro, Iloilo City.
Ang driver sang kotse amo si Senior Jail Officer 3 Alan Lignig, temporaryo nga naga-istar sa Barangay Lanit, Jaro, Iloilo City apang tumandok sang Antique.
Samtang ang driver naman sang truck amo si Raffy Boy Betala, 36, residente sang Barangay Zerrudo, Sara, Iloilo.
Sa interview sang Bombo Radyo kay Police Executive Master Sergeant Richie Dequito, Traffic Investigator sang Iloilo City Police Office – Traffic Investigation and Enforcement Unit, iya ginpahayag nga padulong sa Pavia, Iloilo ang truck samtang ang kotse naman ang padulong sa Lanit, Jaro, Iloilo City.
Suno kay Dequito, may nagabalabag nga loader truck sa dalan rason nga nagkadto sa pihak nga lane ang 12-wheeler truck agud nga makalikaw.
Pahayag niya, naghingagaw man kuntani nga makabalik sa right lane ang driver sang truck apang madasig ang dalagan sang awto sa diin head on collision ang natabo.
Patal nga pilas sa ulo ang naangkon sang jail officer.
Nagapabilin naman sa kustodiya sang Jaro Police Station ang driver sang truck.
