ILOILO CITY- Ginkumpirma ni Presidential Spokesperson Atty. Harry Roque ang iya pagpadulong sa Syudad sang Iloilo sa masunod nga semana.
Ini kasunod man sang pahayag ni Iloilo City Mayor Jerry Treñas nga magapadulong sa Iloilo si Roque kag si vaccine czar Sec. Carlito Galvez Jr. agud magbulig sa pagsolbar sa COVID-19 surge sa syudad.
Sa interview sang Bombo Radyo kay Roque, iya ginpahayag nga magadala sila sang 50,000 doses sang Sinovac vaccine kadungan sang iya pagpadulong sa Iloilo City kaupod si Health Undersecretary Dr. Leopoldo Vega.
Suno kay Roque, magalibot sila ni Dr. Vega sa mga ospital sa Iloilo City.
Ginpasiguro naman sang opisyal nga indi niya pagpabay-an ang Iloilo City bangud ang iya iloy ang naggikan sa distrito sang Jaro.
Matandaan nga nagsabtanay sanday Roque kag Treñas matapos wala nagustuhan sang alkalde ang nangin sabat sini sang nangayo siya sang dugang nga bakuna kasunod sang padayon nga pagdamo sang COVID-19 cases sa syudad.
