Dako ang binuligan ni former President Benigno Simeon ‘Noynoy’ Aquino III sa syudad sang Iloilo.
Ini ang ginakabig handumanan kag ginapasalamatan ni Iloilo City Mayor Jerry Treñas sa anay lider sang pungsod nga nagtaliwan sa edad nga 61 kahapon, Hunyo 24.
Sa interview sang Bombo Radyo kay Mayor Treñas, iya ginpahayag nga nangin masubo para sa iya sang gin-anunsyo nga nagtaliwan na si Aquino.
Suno kay Treñas, si Aquino ang nangin kabangdanan sang ‘very good’ road network kag esplanades sang syudad.
Magluwas diri, madamo man sang ginpirmahan si Aquino nga proyekto sang syudad.
Pahayag sang alkalde, magulang siya sa anay Presidente kag indi niya malipatan nga masami siya ginatawag nga ‘manong’ ni Aquino apisar lider na ini sang pungsod.
”Even when he was President, he would still call me ‘manong’…Amo na ang indi ko man malimtan,”
Nahibaluan nga ginbawian sang kabuhi ang former President bangud sa balatian nga renal disease secondary to diabetes.
