Nagsabat si Iloilo City Mayor Jerry Treñas may kaangtanan sa pahayag ni Presidential Spokesperson Atty. Harry Roque nga pagpang-angga ang pagkabig sini sa ginhaboy nga mga tinaga sang alkalde nga mas madasig pa ang baba sini kumpara sa iya utok.
Sa interview sang Bombo Radyo kay Mayor Treñas, iya ginpahayag nga maayo kay wala sang lain buot si Roque sa iya.
Apang gin-ako sang alkalde nga indi niya naluyagan ang ginhambal ni Roque sa iya nga ang kapaslawan sang pagsunod sang mga tawo sa health protocols ang rason sang pagtimbuok sang kaso sang COVID-19.
Ini ang kasunod sang paghingyo ni Treñas sang bulig kay Roque para sa dugang nga mga COVID-19 vaccines sa syudad bangud madamo na ang ginabawian sang kabuhi tuga sang nasambit nga balatian.
Suno sa alkalde, apektado na ang bug-os nga syudad sang Iloilo sa padayon nga pagsaka sang kaso sang COVID-19 sa diin sang damlag lang, nagtaliwan bangud sa nasambit nga virus si former Iloilo City Vice Mayor Dr. Guillermo ‘Guiling’ De la Llana.
Apang daw kaangay suno kay Treñas nga ginabasol pa ni Roque ang mga pumuluyo sang syudad sa indi pagsunod sa mga pagsulundan ukon health protocols.
”Siya ang waay sunggod, maayo na….ang akon ya indi lang ko ya gusto nga gabatyag na kita di..nagakalamatay nadi like Vice Mayor De la Llana (bangud sa COVID-19) dason kita pa basulon? daw indi na man na husto.”
Matandaan nga ginpanindugan ni Roque nga bisan habuyon pa siya sang matuod nga bato, iduso niya sa gihapon nga ang pagsunod sa health protocols kaangay sang pagpanghugas sang mga kamot, pagmaskara kag pag-obserba sang physical distancing ang makapauntat sang pagtimbuok sang kaso sang COVID-19.
”Maski batuhin na po ako ng tunay na bato, sasabihin ko parin po iyan. Habang walang containment ‘MASK, HUGAS, IWAS’ pa rin, dahil iyan po talaga ang stratehiya.”
