Ginpatigayon subong nga adlaw, Hunyo 25, ang public viewing ni former president Benigno “Noynoy” Aquino III sa Church of the Gesu sa sulod sang Ateneo de Manila Univesity sa Quezon City.
Ang public viewing ang nag umpisa las 10:00 kaina sang aga kag magalawig tubtob las 10:00 karon sa gab-i.
Lakip sa mga nagtambong nga pamilya kag pulitiko amo sanday:
- Senator Risa Hontiveros;
- Former Deputy Speaker of the House of Representatives of the Philippines Raul Daza;
- Filipino Politician Robert Jaworski Jr. kag asawa sini nga si Mikee Cojuangco;
- Senator Ping Lacson;
- Former Secretary sang Department of Social Welfare and Development nga si Dinky Soliman;
- Former Congressman Peping Cojuangco;
- Retired Supreme Court Associate Justice Conchita Carpio – Morales;
- Former Senator kag pakaisa ni the late Aquino III nga si Bam Aquino;
- Former Speaker Feliciano Belmonte Jr.;
- Malabon Mayor kag pakaisa man ni Aquino nga si Antolin Oreta; kag
- Aquino sisters (Kris Aquino, Ballsy Aquino-Cruz, Victoria Elisa Aquino-Dee kag Pinky Aquino-Abellada)
Hugot man nga ginhingyo sang pamilya Aquino ang mga nagpadulong sa public viewing nga magsunod sa health protocols kag mag-obserba sang physical distancing agud malikawan ang paglapta sang COVID-19.
Matandaan nga nagtaliwan si Former President Aquino kahapon, Hunyo 24 sa edad nga 61, bangud sa balatian nga renal disease secondary to diabetes.
Ini ang napatay samtang nagakatulog.
Ang lawas sang anay lider sang pungsod ang gincremate man sang amo nga adlaw.
Bwas, Hunyo 26, pagadal-on ang urn ni Aquino sa Manila Memorial Cemetery sa diin patigayunon ang military funeral honors.
Ilubong ang anay presidente sa tupad sang iya mga ginikanan nga sanday anay Presidente Corazon Aquino kag Senator Benigno Aquino Jr.
Nahibaluan nga nagserbe si Aquino bilang ika-15 nga presidente sang Pilipinas humalin sang 2010 tubtob 2016.
Nagserbe man si Aquino bilang chairman sang Liberal Party humalin sang 2010 tubtob 2016.
Samtang, hugot nga ginapangabay sang anay senador nga si Bam Aquino ang publiko nga dumdumon kag pangamuyuan ang iya pakaisa nga si former President Benigno Simeon ‘Noynoy’ Aquino III.
Suno kay Bam, ginbubo ni Aquino ang tanan niya nga masarangan para sa pungsod sa diin halos wala na ini may ginbilin sa iya kaugalingon.
Gin-ako man sang anay senador nga wala niya napunggan ang mangin emosyonal sang naglupok ang balita nga nagtaliwan ang iya pakaisa nga natalana pa kuntani niya nga bisitahon sa Dominggo, Hunyo 27.
