Nagdangat sa 42 ka mga balay ang naguba matapos gin-agyan sang buhawi ang walo ka mga barangay sa Lambunao, Iloilo.
Sa exclusive interview sang Bombo Radyo kay Lambunao, Iloilo Vice Mayor Arvin Losaria, iya ginpahayag nga ang 42 ka mga balay ang nagikan sa walo ka barangay nga amo ang masunod:
- Jorog;
- Legayada;
- Cayan Este;
- Lanot Grande;
- Lanot Pequeño;
- Simsiman;
- Quiling; kag
- Corot-on
Suno kay Losaria, lunsay human sa light materials ang mga nagkalaguba nga balay.
Apisar sini, wala sang may ginbawian sang kabuhi kag wala man sang may nasamaran.
Pahayag ni Losaria, malapit sa tunga sa milyon ang kabug-usan nga halit nga gintuga sang buhawi.
Nagapasalig man ang local government unit sang Lambunao, Iloilo sang bulig pinansyal para sa mga pamilya nga nagub-an sang balay.
Dugang pa sang bise-alkalde, ‘unique phenomenon’ nga makabig para sa mga taga Lambunao, Iloilo ang naglabay nga buhawi.
