Nagapreparar ang Western Visayas Medical Center (WVMC) sa tion nga magsaka ukon magsurge ang kaso sang Dengue Hemorrhagic Fever sa syudad sang Iloilo.
Sa interview sang Bombo Radyo kay Mr. Richard Saltin, spokesperson for COVID-19 concerns sang WVMC, iya ginpahayag nga sa subong, isa pa lamang ang kaso sang nasambit nga balatian sa ila nga ospital.
Suno kay Saltin, positibo man sa COVID-19 ang pasyente nga may Dengue Hemorrhagic Fever.
Pahayag ni Saltin, ang nasambit nga balatian ang masami nagadamo kun Mayo tubtob Septyembre kada apat ka-tuig.
Pahayag niya, sa subong, bastante ang mga hospital bed sang WVMC para sa mga NON-COVID-19 patients.
Samtang, walo na man ang kaso sang Dengue Hemorrhagic Fever sa probinsya sang Iloilo.
Sa interview sang Bombo Radyo kay Dr. Cynthia Cabangal Ng, head sang Hospital Management Office sang Iloilo Provincial Government, iya ginpahayag nga sa walo ka kaso, isa ang nagikan sa Sara, Iloilo, isa man sa Dumanggas, Iloilo, duha sa Balasan, Iloilo kag tatlo naman ang nagikan sa San Joaquin, Iloilo.
Suno kay Ng, nakahanda man ang probinsya sa tion nga magtimbuok ang kaso sang Dengue Hemorrhagic Fever tuga sang nagalamig kag maulanon na nga panahon.
Pahayag ni Ng, santo sa cycle sang nasambit nga balatian, ginapanan-aw nga magsaka ang kaso sini sa masunod nga tuig 2022 sa probinsya sang Iloilo.
Sa subong suno sa iya, bastante man ang hospital beds sang Iloilo Province sa pag-akomodar sang COVID-19 patients kag Non-COVID-19 patients sa diin padayon ang ila preparasyon sa tion nga madugangan pa ang kaso sa Dengue Hemorrhagic Fever sa probinsya.
