Dako ang posibilidad nga may foul play sa likod sang ginapahayag paghikog sang isa ka dalagita sa Barangay Tanza-Esperanza, Iloilo City Proper.
Ang biktima amo si alyas Jasmine kag naga-edad 15.
Nahibaluan nga ginapahayag nga wala sang underwear ang dalagita sang natabo ang ginaalegar suicide incident.
Ang nakakita sa biktima amo ang iya manghod nga 13 anyos nga may special needs kag makatingalahan ang naangkon sini nga pilas sa ulo.
Santo sa nangin pahayag sang doktor, 11 ka gagmay nga pilas sa ulo ang naangkon sang 13 anyos nga manghod sa diin indi man ini mapamangkot sang mga pulis bangud wala ini nagahambal.
Sa interview sang Bombo Radyo kay Punong Barangay Wilbur Orada sang Tanza-Esperanza, Iloilo City Proper, iya ginpahayag nga santo sa ila pagpakig-angot sa mga pulis, may yara na sang person of interest may kaangtanan sa natabo kay alyas Jasmine.
Apang indi pa ini madivulge sang mga otoridad.
Suno kay Orada, ginahulat na lamang ang resulta sang autopsy test sa bangkay sang biktima.
Pahayag ni Orada, ginahulat man ang desisyon sang ginikanan ni Jasmine may kaangtanan sa imbesitigasyon sa natabo sa biktima sa diin nakapauli naman ang iloy sini nga nagtrabaho bilang domestic helper sa luwas sang pungsod apang padayon pa subong nga ginaquarantine sa Manila.
Samtang, nakapreso naman ang amay sang biktima bangud sa ginapahayag kaangtanan sa iligal nga droga.
Dugang pa sang opisyal, nalubong naman ang bangkay sang biktima matapos ginhaya sa sulod sang tatlo ka-adlaw.
