Hugot nga ginabantayan sang Philippine Coast Guard (PCG) ang mga port kag mga nagabyahe nga vessel kasunod sang pagpalagyo sang Vietnamese national matapos nagpositibo sa COVID-19.
Una diri, ginpahayag nga magapadulong kuntani sa Palawan ang Vietnamese national pati ang iban niya nga kaupdanan.
Sa interview sang Bombo Radyo kay PCG-Iloilo Station Commander Edison Diaz, iya ginpahayag nga sa subong, kumpirmado nga wala sang Vietnamese national nga nakasakay sa shipping line padulong sa Palawan.
Suno kay Diaz, may nabaton sila nga impormasyon nga may siyam ka-tawo nga nagaproseso sang ila Safe, Swift, and Smart Passage (S-PaSS) Travel requirement agud makabyahe padulong sa amo nga lugar.
Apang suno kay Diaz, napaslawan man ang mga ini nga makaproseso sang S-PaSS.
Nahibaluan nga nagapuyo sa isa ka apartment sa Arevalo, Iloilo City ang amo nga Vietnamese national.
Nagpaidalom ini sa COVID-19 test sa syudad sang Passi.
Sang nagwa ang resulta sang COVID-19 test, gilayon ini nga ginforward sang Passi City sa City Epidemiology and Surveillance Unit (CESU) sa syudad sang Iloilo.
Una na nga ginkontak sang COVID-19 Team sang Iloilo City Government ang Vietnamese national apang sa ikaduha nga kahigayunan, wala na ini nagasabat kag naka-off naman ang cellphone sini.
Sa subong padayon pa nga ginapangita sang mga otoridad ang Vietnamese national agud indi na ini makalagaw kag makapalapta sang virus.
