Arestado ang isa ka motorista sa drug buy bust operation nga ginpatigayon sang Criminal Investigation and Detection Group (CIDG) Iloilo City Field Unit kag Regional Police Drug Enforcement Unit (RDEU) sa Barangay San Pedro Molo, Iloilo City.
Ang arestado amo si Kent Gutas, 38 kag residente sang nasambit nga lugar.
Sa interview sang Bombo Radyo kay Barangay Kagawad Rhomar Martirez, iya ginpahayag nga subong lamang nila natukiban nga ginabanta duha na ka-tuig nagabaligya sang suspected shabu ang iya pumuluyo nga si Gutas.
Apang suno kay Martirez, ini bangud wala man nagabaligya sang iligal nga droga si Gutas sa San Pedro, Molo, Iloilo City.
Ginapahayag wala man sang ihibalo ang pamilya ni Gutas nga nagabaligya ini sang iligal nga droga.
Samtang, ginapahayag nga wala nagatransaksyon sang iligal nga droga ang arestado kundi nagadeliver lamang.
Sa interview sang Bombo Radyo kay Police Lieutenant Colonel Mark Anthony Darroca sang Regional Drug Enforcement Unit, iya ginpahayag nga kabahin si Gutas sang grupo nga nagabaligya sang iligal nga droga sa syudad kag probinsya sang Iloilo.
Suno kay Darroca, nagahupot kag nagadeliver si Gutas sang iligal nga droga nga ginatransaksyon sang iya nga boss.
Pahayag ni Darroca, may mga impormasyon naman sila kun sa diin ang iban pa nga kaupdanan ni Gutas.
Nakuhaan ang arestado sang isa ka gamay kag 11 ka dalagko nga sachet sang suspected shabu nga ginabanta nagabalor sang masobra P400,000.
Magapangatubang man ini sang kaso nga paglapas sa Republic Act 9165 ukon Comprehensive Dangerous Drugs Act of 2002.
