Wala nakaluwas si Senator Manny Pacquiao kay Presidente Rodrigo Duterte kagab-i sa Talk To the Nation bangud sa nangin pahayag sang senador nga nangin mas malala pa ang kurapsyon sa idalom sang Duterte administration.
Si Pacquiao kag Duterte ang magkaupod lang sa Partido Demokratiko Pilipino–Lakas ng Bayan (PDP-Laban) sa diin nagaserbe bilang presidente ang senador.
Ginhangkat ni Duterte si Pacquiao nga i-identify ang mga kurap nga ahensya sang gobyerno.
Suno kay Pres. Duterte, makapila na niya ginhambal sadto nga kun may nahibaluan tuhoy sa kurapsyon, ipahibalo gilayon sa iya apang wala man sang may ginhimo si Pacquiao kundi nga dayawon ang presidente sang pungsod.
Pahayag ni Duterte, indi dapat pagpanumdumon ni Pacquiao nga kun magdaog siya bilang presidente, basta-basta na lang nga madula ang kurapsyon sa Pilipinas.
Daw kaangay man suno kay Duterte nga nagadamgo si Pacquiao sa nangin pahayag sini nga manghatag siya sang mga balay.
Ginpahayag man sang presidente nga siya mismo ang magakampanya batuk kay Pacquiao kun mapaslawan ang senador nga kilalahon ang mga kurap nga opisyal nga yara sa idalom sang administrasyon.
