Patay ang 55-anyos nga lalaki matapos ginluthang sang iya pakaisa sa Barangay Tigbayog, Calinog, Iloilo.
Ang biktima amo si Nestor Compleza, residente sang amo nga barangay.
Ang suspek amo si Rodel Compleza, 42, residente sang Barangay Manaripay sa amo man nga banwa.
Sa interview sang Bombo Radyo kay Police Executive Master Sergeant Ricky Lubas, imbestigador sang Calinog Municipal Police Station, iya ginpahayag nga patal nga pilas sa dughan ang naangkon sang biktima matapos ginluthang sang suspek gamit ang 12 gauge homemade shotgun.
Suno kay Lubas, nag-umpisa ang indi paghangpanay sang nagpadulong ang anak sang suspek sa balay sang biktima agud nga mag-charge sang cellphone.
Sirado ang balay kag wala sang tawo gani nga nagmato-mato ini nga buksan ang puertahan kag ginsaksak ang cellphone.
Sang nag-abot ang biktima, nakit-an sini nga bukas na ang puertahan sang iya balay, may naka-charge nga cellphone, kag wala na ang isa ka sako nga palay.
Gin-gabot sini ang naka-charge nga cellphone kag sang buot na nga kadtuan ang iya nga hinablos, nasugata sini ang suspek nga amo ang amay sang bata nga nag-charge.
Ginapahayag nga may kumprontahanay nga natabo kag sang ulihi, naggabot ang biktima sang kutsilyo agud bun-on ang suspek apang madasig man ini nga nagpalupok sang armas.
Sa subong padayon pa nga ginapangita sang mga pulis ang suspek sa krimen.
