ILOILO CITY- Mangayo sang bulig sa Land Transportation Office (LTO) ang Iloilo City may kaangtanan sa kapaslawan sang syudad nga mapatuman sang istrikto ang Anti-Modified Muffler Ordinance bangod sa kakulang sa equipment.
Sa interview sang Bombo Radyo kay City Councilor Atty. Rommel Duron, chairman sang Committee on Transportation, iya ginpahayag nga magadangop siya sa LTO bangud may ordinansa man ukon wala, ini ang ginapatuman na nga daan sang ahensya sa bilog nga pungsod.
Una na nga ginpahayag ni Mr. Jeck Conlu, pinuno sang Public Safety and Transportation Management Office (PSTMO) nga may yara ang talatapan sang lima lang ka
decibel meter nga amo ang measuring instrument nga makatumod sa kagahudon ukon sa sound levels sang salakyan.
Samtang, wala naman sang nasambit nga measuring instrument ang Iloilo City Police Office nga amo man kuntani ang implementing arm upod sa PSTMO sa pagpatuman sang ordinansa.
Nahibaluan nga sa nasambit nga ordinansa, ginadumilian ang mga salakyan nga nagatuga sang gahod nga masobra sa 115 decibels.
Gindugang naman ni Duron nga wala naman ini sang plano nga amyendaran pa ang nakasaad sa ordinansa apang suno sa iya, mas maayo kon maaprubahan na ang ginaduso sang LTO nga panubuan sa 99 decibels sa baylo nga 115 decibels ang limit sa gahud nga ginatuga sang mga salakyan.
