ILOILO CITY- Gina- account na subong sang kabarangayan sa Iloilo City ang mga senior citizens sa tagsa ka barangay para sa ginaplano nga house to house vaccination rollout para sa mga tigulang.
Sa interview sang Bombo Radyo kay Punong Brgy. Roberto Nino sang Calumpang, Molo, Iloilo City kag spokesperson sang Liga nga mga Barangay sa syudad, iya ginpahayag nga prayoridad sa sini nga plano amo ang mga tigulang nga bedridden kag Persons with Disability (PWD).
Suno kay Nino, mahimo man makig-angot sa Barangay Health Center kag Barangay Health Emergency Response Team (BHERT) ang pamilya sang sini nga mga senior citizens para sa mas madasig nga pag-account sa ila.
Suno kay Nino, kon ma- account na ang tanan nga senior citizens, ini ang ipresentar sa district health officer agud nga makahimo sang sistema para sa patigayunon nga house to house vaccination sang Iloilo City Health Office kag sang vaccination team.
