ILOILO CITY- Nasapwan nga nagabitay kag wala na sang kabuhi ang isa ka lalaki sa ginatiniran nga boarding house sa Iznart St., Brgy. Magsaysay, Iloilo City Proper.
Ang biktima amo si alyas Nonoy, ginabanta nagaedad sang masobra 30 anyos, residente sang
San Antonio, Molo, Iloilo City, kag negosyante sang bulak sa Iloilo Central Market.
Sa interview sang Bombo Radyo kay Brgy. Kagawad Catalino Palomo sang Magsaysay, Iloilo City Proper, iya ginpahayag nga nakit-an sang boardmate sang biktima nga nagabitay na ini sa iya hulot gamit ang lubid.
Gintuad naman ni Palomo nga wala man ini naghuna-huna nga nagaoperate pa ang nasambit nga boarding house bangud ginpasirado na ini sang Iloilo City Boarding House Commission bangud sa mga violations.
Sa interview naman sang Bombo Radyo kay Punong Barangay Eric Gallego sang San Antonio, Molo, Iloilo City kag maninoy sa kasal sang biktima, iya ginpahayag nga wala sang upod sa hulot ang biktima bangod naka-quarantine ang iya asawa matapos nangin close contact sang iya napatay nga amay apang natapos naman subong nga adlaw ang iya quarantine kag nakagwa na.
Suno kay Gallego, indi pa matumod kon ano ang gid ang matuod nga kabangdanan sang pagpanginmatay sang biktima bangod nga maayo man ang pag-updanay nila nga mag-asawa.
Apang suno kay Gallego, base sa iya pagkakilala, hipuson nga klase sang tawo ang biktima kag wala man ini nagapanugid sang iya problema.
