Kinahanglan sundon sang Iloilo Police Provincial Office (IPPO) ang naga-eksister nga Executive Order 222 ni Iloilo Governor Arthur Defensor Jr. sa diin ginkakas na ang quarantine control points sa mga kabanwahanan sa probinsya.
Sa interview sang Bombo Radyo kay IPPO Director PCol. Gilbert Gorero, iya ginpahayag nga bangud wala na sang border control, magafocus ang kapulisan sa istrikto nga pagpatuman sang reverse isolation, kag pagpatigayon sang surgical lockdown sa mga barangay nga may yara sang positibo nga kaso sang COVID-19.
Suno kay Gorero, kun may banwa sa probinsya nga luyag ipabilin ang quarantine control point kag may yara sang executive order halin sa alkalde tuhoy diri, suportado kag ikonsidera man ini sang IPPO.
Apang sa subong, balik anay sa tagsa ka mga police stations ang mga kapulisan nga una gin-assign sa mga quarantine control points sa kabanwahanan.
