Ginmando ni Philippine National Police (PNP) Chief Police General Guillermo Lorenzo Eleazar ang ma-id-id nga imbestigasyon agud matumod kun may operational lapses sa kontrobersyal nga pagkaluthang-patay sang mga operatiba sang Iloilo City Police Office (ICPO) sa nasal-an nga subject sa buy-bust operation sa Barangay North Baluarte, Molo, Iloilo City.
Ang biktima amo si Karl Daniel Bolante, 27, residente sang North Baluarte Molo, Iloilo City kag ang matuod nga subject amo si Dave Mendoza, 23 anyos sang Rizal Pala-Pala 2, Iloilo City Proper.
Suno kay Police General Eleazar, nagakadapat nga malakip sa kaugalingon nga imbestigasyon sang Regional Internal Affairs Service (RIAS) 6 ang kamatuoran sa likod sang ginapahayag nasal-an nga subject sa buy-bust operation.
“I understand that there is already a motu-proprio investigation on this but with this allegation, I have already tasked the IAS to look into this new information para malinawan tayo,” pahayag ni Eleazar.
Matandaan nga ginhingagaw pa dala sa ospital si Bolante apang bangud sa patal nga pilas sa dughan, ginbawian ini sang kabuhi.
Natigayon naman nga maaresto ang subject nga si Mendoza.
Si Mendoza ang nakaagi na aresto sang 2017 sa isa man ka buy-bust operation.
Apang nag-avail ini sang plea bargaining agreement sa korte kag nakagwa sa presuhan sang Nobyembre 25,2020.
Nahibaluan nga narekober sa buy bust operation ang M26 hand grenade, kag 38 caliber pistol.
Nakuha naman sa possession ni Mendoza ang tatlo ka sachets sang suspected shabu kag P2,000 nga buy bust money.
“Dahil po sa may alegasyon na namang ganito, tayo at nakikiusap muli sa mga nakakita at kamag-anak ng nasawi na tulungan tayo na mahanap ang katotohanan dito,”
“Kung kayo ay may alam sa nangyaring ito, nararapat lang na panindigan ang katotohanan sa ngalan ng hustisya. At ako naman ay personal na nangangako ng inyong proteksyon kung meron ngang kamalian na nangyari dito,” dugang pa ni Eleazar.
Samtang, una na nanindugan ang pamilya Bolante nga indi konektado ang 27 anyos nga si Karl kay Mendoza.
Santo sa isa ka footage sang Closed Circuit Television (CCTV) nga narecover sang otoridad, nakit-an nga ang una nga ginlagas sang mga pulis amo si Mendoza apang nakapalagyo ini kag nagsulod sa eskinita.
Sa isa pa ka kuha sang CCTV, nakit-an man nga nagalakat si Karl kaupod ang isa pa ka abyan.
Naka-boxer shorts si Karl kag may bitbit nga cellphone.
Nagkuob si Karl kag ang iya nga abyan kag naghana pa nga magpalagyo bangud sang linukpanay nga nabatian.
Sunod nga nakit-an ang subject nga si Mendoza nga ginalagas sang mga operatiba.
Suno sa pamilya Bolante, nasalabat lang si Karl, indi ini konektado sa subject, kag wala ini sang dala nga pusil kag granada.
Sa version naman sang pulis, nagpamalibad nga magpadakop ang subject nga si Mendoza, nagpalagyo, kag sang na-corner na sang mga pulis, ang kaupod sini nga si Karl ang naghana nga maghaboy sang granada sa isa ka PNP personnel rason nga nagpalupok ang pulis kag napatay si Karl.
Hugot man ang panindugan sang Iloilo City Police Station 1 nga lehitimo ang amo nga drug buy bust operation.
Nagpasalig naman sang kooperasyon ang Iloilo City Police Office (ICPO) sa kaugalingon nga imbestigasyon sang Regional Internal Affairs Service (RIAS) VI may kaangtanan sa ginpatigayon nga drug buy bust operation sa diin naluthangan-patay sang mga operatiba sang ICPO ang nasal-an nga subject nga si Karl Daniel Bolante.
Sa interview sang Bombo Radyo kay Police Capt. Shella Mae Sangrines, spokesperson sang ICPO kag hepe sang Iloilo Police Station 1, iya ginpahayag nga nagapasalig siya nga magacomply sila sa tanan nga request sang RIAS VI para sa imbestigasyon.
Suno kay Sangrines, ginpasa naman nila ang tanan nga dokumento nga ila natipon agud matumod sang investigating body ang matuod nga natabo sa ginpatigayon nga drug buy bust operation.
Gin-ako man ni Sangrines nga nahangpan kag ginarespeto niya ang tanan nga sentyemento sang pamilya Bolante rason nga nagapalab-ot man siya sang pag-unong diri.
Nahibaluan nga magapangatubang sang kaso nga grave irregularity in the performance of duty si Police Corporal Rodante Lopez, operatiba sang Iloilo City Police Station 1 – Station Drug Enforcement Team, nga nag-ako nga siya ang nakaluthang-patay kay Karl Daniel Bolante sang ginpatigayon sang mga pulis ang drug buy bust operation.
Samtang magapangatubang naman sang kaso nga irregularity in the performance of duty based on the doctrine of command responsibility si Police Captain Sangrines.
