Patay ang isa ka driver matapos nagbunggo ang ginamaneho nga single nga motorsiklo sa isa ka poste sa Circumferential Rd. 1, Barangay Tacas, Jaro, Iloilo City.
Ang biktima amo si alyas ‘Jeff’, 32, kag residente sang Leon, Iloilo.
Sa interview sang Bombo Radyo kay Punong Barangay Joseph Poral sang Tacas, Jaro, Iloilo City, iya ginpahayag nga naghalin sa distrito sang Jaro, Iloilo City kag padulong kuntani sa Leon, Iloilo ang biktima.
Ginapahayag ginabanta las 2:00 sang kaagahon natabo ang insidente.
Suno kay Poral, sang yara na sa crossing sang Circumferential Rd. 1, hinali lang nga may naglabay nga madasig nga salakyan rason nga nadulaan sang balanse ang biktima kag nagbunggo sa poste ang ginamaneho nga motorsiklo.
Ginhingagaw pa dala sang mga otoridad sa ospital si alyas Jeff apang ginbawian man sang kabuhi.
Nakaangkon sang patal nga pilas sa ulo ang biktima nga amo ang gintunaan sang kamatayon sini.
