Dako nga ang posibilidad nga hungod nga ginpangsunog ang pito ka mga simbahan sa Canada.
Suno kay Bombo International Correspondent Gregorio Galido direkta sa Canada, ginapahayag nga arson attacks ukon hungod nga mga pagpangsunog ang nagakatabo sa diin roman catholic churches ang lunsay ginatarget.
Kadam-an sa mga apektado nga simbahan ang makit-an sa indigenous communities.
Pahayag ni Galido, ini ang kasunod sang mga panawagan sa Simbahang Katolika nga magpangayo sang patawad para sa mga linibo nga bangkay kag unmarked grave nga nasapwan sa mga ginpatindugan sang residential schools nga ginadumala sang mga Simbahan.
Ini nga residential schools ang para sa mga indigenous children sa diin humalin sang 1840s tubtob 1990s ginapahayag may nagakatabo nga ‘cultural genocide’ sa sulod sang mga eskwelahan.
Ginpahayag nga sa sulod sang ginabanta 110 ka-tuig, kapin 150, 000 ka mga kabataan nga kabahin sang indigenous community ang ginapadala sa residential schools sa diin gindangutan ang mga ini sang kultura , lenggwahe, kag gina-abuso indi lamang sa pisikal nga aspeto kundi mangin sa emosyonal kag sekswal.
Tubtob subong, indi man sa gihapon mapat-od kun pila ang numero sang mga kabataan nga ginbawian sang kabuhi bangud sa malnutrition kag pila ka mga balatian bangud ginapahayag lunsay ginpangguba ang ila record.
