Indi na makibot pa ang isa ka abogado kun sa pila ka adlaw, may yara sang magguwa nga mga whistleblowers agud nga magbulig kay Sen. Manny Pacquiao sa pagpaguwa sang mga ginapahayag kurapsyon sa Duterte administration.
Sa interview sang Bombo Radyo kay Atty. Joenar Pueblo, iya ginpahayag nga mahapos para kay Pacquiao nga magtipon sang ebidensya ukon testimoniya halin sa whistleblower bangud may yara siya sang financial resources.
Apang nagaguwa ang ini nga mga issue bangud malapit na lang ang eleksyon kag dako ang pagpati sang abogado nga lunsay pamulitika ang nagakatabo bangud kun isip-isipon, mag abyanay man sadto si Pacquiao kag Duterte nga sa pagkamatuod mismo ang presidente pa ang nag-endorso sa senador sang tinalikdan nga eleksyon.
Suno kay Pueblo, natunga na subong ang Partido Demokratiko Pilipino–Lakas ng Bayan (PDP-Laban) bangud sa tensyon sa tunga nanday Pacquiao nga nagaserbe bilang presidente sang grupo kag Duterte nga amo ang chairman sang partido.
Ang realidad pahayag sang abogado, mabudlay papason ang kurapsyon — mahimo lamang ini ma hagan-hagan pero indi ini gilayon nga madula.
Apang nagapati si Atty. Pueblo nga may yara man sang mga indibidwal nga nagakapreso bangud sa paglapas sa Republic Act 3019 ukon Anti-graft and Corrupt Practices Act.
Kinahanglan dugang pa sang abogado nga masaligan sang tawo ang isa ka public official sa diin dapat nga ginasiguro sini nga ma-proteheran ang kwarta sang publiko pinaagi sa pagserbisyo sa gobyenrno.
Ang penalidad sa paglapas sang RA 3019 amo ang pagkapreso kun kaso kriminal ang ginapangatubang sang isa ka public official samtang pagpahalin naman sa pwesto ukon indi na makabalik pa sa public office kun kaso administratibo naman ang ginapangatubang.
Sa pamangkot kun bala may yara man sang salabton si Pres. Duterte sa paglapas sa RA 3019, pahayag ni Atty. Pueblo, makakilibot man kun wala sang grupo nga makapasaka sang kaso batuk kay Duterte sa tion nga matapos na ang iya nga termino.
Bangud kun basehan ang natabo sa mga anay presidente, sa kada pagtakop sang ila nga termino, may yara gid ang mga ini sang kaso nga ginapangatubang.
Apang sa bahin ni Duterte, dugang sang abogado, pat-od nga lagson ini sang International Criminal Court.
