ILOILO CITY- Gin-athag ni Iloilo City Mayor Jerry Treñas nga mahimo nga ilakip sa barangay- based COVID-19 vaccination nga magasugod sa Byernes, Hulyo 9, ang mga pumuluyo nga wala nalakip sa category nga Persons with Disabilities (PWDs), senior citizens kag ang mga may yara sang comorbidities.
Sa interview sang Bombo Radyo kay Mayor Treñas, iya ginpahayag nga apisar prayoridad ang mga tigulang kag PWD, apang kon indi maubos ang ginpain nga doses sang bakuna, ihatag ini sa iban nga residente nga luyag magpatublok.
Suno sa alkalde,ginmando niya nga ubuson ang tanan nga bakuna nga ginapagwa sang syudad bangud nga komplikado kag magamo ang proseso sang pag-imbentaryo.
Gindugang sang alkalde nga samtang ginapatigayon ang barangay-based inoculation, magapadayon man ang pagpangbakuna sa designated vaccination centers sa syudad nga ginalakipan sang Iloilo Convention Center (ICON), Central Philippine University (CPU), Ateneo de Iloilo, University of San Agustin (USA), kag University of the Philippines -Visayas (UPV).
Suno sa alkalde, may 50,800 doses pa sang Sinovac vaccine ang syudad kag subong nga semana, target maubos ang 30,000 ka doses sang bakuna.
Nahibaluan nga patigayunon sa Calumpang, Molo, Iloilo City ang labing una nga barangay- based vaccination.
