Nagkaladakpan kag lunsay gindagdagan sang multa ang lima ka mga driver sang hauler nga nagpatigayon sang quarry ukon paghakot sang balas apisar maulanon kag basa ang dalanon sa Dueñas, Iloilo.
Sa interview sang Bombo Radyo kay Dueñas Mayor Mamerto Pelopero III, iya ginpahayag nga may ordinansa ang banwa sang Dueñas, Iloilo sa diin ginhisugtan sang quarry operators nga indi sila magpatigayon sang paghakot sang balas kun naga-ulan, antes ang las 8:00 sang aga.
Suno kay Pelopero, ginadumilian ang pagpatigayon sang quarrying sa tion nga mag-ulan bangud nagakaguba ang dalan nga ginalabayan sang mga truck nga nagahakot sang balas.
Apang pahayag sang alkalde, may yara sa gihapon sang lima ka driver sang hauler nga nadakpan nga nagapanghakot sang balas apisar maulanon sa diin gindagdagan na ang mga ini sang multa nga P1,500.
Ang lima ka mga driver sang hauler ang ginalakipan sang duha nagikan sa Barangay Jaguimit, duha man nagikan sa Barangay Pader kag isa sa Barangay Dila-an, Dueñas, Iloilo.
