ILOILO CITY – Tatlo ka aktibidad ang himuon sang mga miyembro sang Bureau of Fire Protection (BFP) Region VI bwas, Hulyo 8, bilang penalidad kasunod sang paglapas sa COVID-19 protocol.
Ini ang kaangot sa pagtililipon nga ginhimo sang BFP para sa inagurasyon sang isa ka substation sa Alta Tierra Village, Jaro, Iloilo City sang nagligad nga Hunyo 10.
Matandaan nga ang amo nga aktibidad ang ginpakamalaot sang publiko bangud nalapas ang protocol sa syudad nga pagdumili sa anuman nga sahi sang social gathering.
Sa interview sang Bombo Radyo kay BFP 6 Regional Director Fire Senior Supt. Atty. Jerry Candido, iya ginpahayag nga santo sa ila naistoryahan ni Mr. Nestor Canong, pinuno sang compliance team, ang ila penalidad amo ang mga masunod:
- Pagpaninlo sa coastal area sa Barangay Sto. Niño Sur, Arevalo, Iloilo City
- Pag-organisa sang community pantry para sa 200 ka mga pumuluyo sa Iloilo Freedom Grandstand
- Pagtanum sang mangroves sa Brgy. Hinactacan La Paz, Iloilo City
Suno kay Candido, tapuson sang BFP ini nga community service sa sulod sang isa lang ka adlaw.
Nahisugtan man sang mga katapo sang talatapan nga maupod sa community service ang mga off-duty personnel bangud tanan sila suno kay Candido ang naapektuhan sang naglupok ang amo nga kontrobersiya.
Matandaan nga sa amo nga pagtililipon, yara ang masobra 20 ka uniformed personnel sang BFP kag si Iloilo City Lone District Representative Julienne “Jam-jam” Baronda nga una naman nagpahayag nga handa man siya nga mag-render sang community service.
