ILOILO CITY- Indi man makakita ang duha ka mata kag literal nga madulom ang kalibutan sang isa ka padre de pamilya, kaangay nga naghatag sang kasanag sa iya kabuhi ang pagdaog niya sang Limited Edition Commemorative radio set nga may logo 55th Anniversary sang Bombo Radyo Philippines kag 200 pesos cash.
Sa interview sang Bombo Radyo kay Agustin Borreros sang Lanit, Jaro, Iloilo City, iya ginpahayag nga apisar bulag ini, gintunguhaan gid niya nga maagpadulong sa estasyon sang Bombo Radyo agud maghulog sang iya entry kag wala gid ini napaslawan bangud nabunutan ang iya pangalan.
Suno kay Borreros, bilang isa ka bulag, nangin dalangpan niya ang pagpamati sa Bombo Radyo agud makapamati sang mga balita.
Pahayag ni Borreros, ang radyo ang nagserbe nga kaangay sang isa ka manugtuytoy sa iya agud masanagan siya sa mga nagakatabo sa palibot apisar indi man niya ini makit-an.
Si Borreros isa ka masahista nga pila ka bulan nga nadulaan sang trabaho bangod sa pandemya apang nakabalik naman subong matapos gintugutan na sang syudad.
May duha ini ka kabataan nga lalaki kag bulag man ang isa sa ila.
Pahayag ni Borreros, kon paano niya ginahalungan ang iya mga kliyente nga nagapamasahe sa iya, ini man ang paghalong nga ihatag niya sa nabaton nga Limited Edition Commemorative radio set nga may logo 55th Anniversary sang Bombo Radyo Philippines.
