Posible nga may yara sang scientific basis ang Inter-Agency Task Force for the Management of Emerging Infectious Diseases (IATF-EID) sa pagpahanugot sa mga fully vaccinated nga indibidwal nga magbyahe sa nagkalain-lain nga bahin sang Pilipinas apisar wala na sang negative nga swab test result.
Sa Resolution No. 124-5 sang IATF, nasaad nga ang mga fully vaccinated nga indibidwal ang kinahanglan na lamang nga magpakita sang ila vaccination card para sa interzonal travel kag intrazonal movement.
Apang nagreklamo ang pila ka mga local government units sa bag-o nga polisa rason nga nagpagwa sang pahayag si Department of Health Secretary Francisco Duque III nga kinahanglan na naman nga magpakita sang NEGATIVE COVID-19 test sa tion nga magtravel.
Sa interview sang Bombo Radyo kay Dr. Philip Ian Padilla, public health expert kag Vice Chancellor for Academic Affairs sa University of the Philippines -Visayas, iya ginpahayag nga ang mga fully vaccinated individuals ang may yara sang pat-od nga proteksyon batok sa COVID-19.
Suno kay Padilla, apang kun matapikan man ang indibidwal sang nasambit nga virus apisar nga nakabaton na sang duha ka doses sang bakuna, indi ini mangin severe ukon mangin makalalaton.
Bangud sini, nagapati si Padilla sa ginaduso sang IATF nga pahalugan ang protocol sa pagbyahe para sa mga indibidwal nga nakabaton na sang kompleto nga dose sang bakuna batok sa COVID-19.
Apang nagakadapat lamang suno sa natungdan nga masiguro sang national government ang uniform nga vaccination card para sa mga indibidwal nga fully vaccinated agud mapat-od nga nakabaton na ang mga ini sang duha ka doses sang bakuna.
Dugang pa sang health expert, malikawan ang mga isyu kag problema kun ang vaccination card nga ihatag para sa mga fully vaccinated individuals ang may yara sang code ukon mabaskog nga pamatuod nga nakabaton ang mga ini sang bakuna batok sa COVID-19.
