Luyag kuntani sang Partido Demokratiko Pilipino–Lakas ng Bayan (PDP-Laban) nga palawigon pa ang termino ni Presidente Rodrigo Duterte KUN posible.
Ini ang nangin pronouncement ni House Speaker Lord Allan Velasco kadungan sang pagsinapol sang nasambit nga partido kaupod ang presidente.
Ginpahayag ni Velasco kay Duterte nga sa tagipusuon sang ila mga kaupdanan sa PDP-Laban, mas maayo kuntani kun i-extend pa ang termino sang presidente.
Apang suno sa iya, indi ini posible subong ilabi na nga malapit na lang ang 2022 elections.
Kun ano man ang mangin mandu ni Duterte dugang ni Velasco, ila ini nga sundon bilang mga myembro sang partido.
Nahibaluan nga ang term extension sa pagka-Presidente ang wala ginapahanugutan sa idalom sang layi.
Ang termino ni Presidente Duterte ang magatakop na sa Hunyo 30, 2022.
Apang determinado naman si Velasco sa pagduso kay Duterte nga magpadalagan sa pagka-bise presidente.
